Vertikal media Media
നടി ആക്രമിക്കപ്പെട്ട കേസില്‍ 56 ദിവസമായി തടവില്‍ കഴിയുന്ന നടന്‍ ദിലീപിന് വീട്ടിലെത്തി . പിതാവിന്റെ ശ്രാദ്ധത്തില്‍ പങ്കെടുക്കാന്‍ അങ്കമാലി മജിസ്‌ട്രേറ്റ്‌ കോടതി രണ്ടു മണിക്കൂര്‍ നേരത്തേക്ക് അനുവദിച്ച പരോളില്‍ താരം ജയിലില്‍ നിന്നും പുറത്തിറങ്ങി. പെരിയാറിനോട് ചേര്‍ന്നുളള ആലുവ കൊട്ടാരക്കടവിലെ പദ്മസരോവരം എന്ന വീട്ടിലാണ് ചടങ്ങുകള്‍. വീടിനുചുറ്റും വൻ ജനക്കൂട്ടം, കനത്ത സുരക്ഷയാണു ദിലീപിന് പോലീസ്‌ ഏര്‍പ്പെടുത്തിയിരിക്കുന്നത്. രാവിലെ എട്ടു മുതല്‍ പത്തുവരെയാണ് ജയില്‍മോചനം.
ആലുവ ഡിവൈഎസ്പിക്കാണ് ദിലീപിന്റെ സുരക്ഷ ചുമതല. മൂന്ന് സിഐമാരും സുരക്ഷാ സംഘത്തിലുണ്ട്.എട്ടു മുതൽ പത്തുവരെയാണ് ദിലീപിന് ഇളവ് അനുവദിച്ചിരിക്കുന്നത്.താരത്തിനു സുരക്ഷാ ഭീഷണിയുണ്ടെന്ന്‌ നേരത്തേ പോലീസ്‌ രഹസ്യാന്വേഷണ വിഭാഗം റിപ്പോര്‍ട്ട്‌ ചെയ്‌തിരുന്നു. കേസില്‍ പ്രതിചേര്‍ക്കപ്പെട്ടതിനെ തുടര്‍ന്ന്‌ ദിലീപിനെതിരേ വ്യാപക പ്രതിഷേധം ഉയര്‍ന്നിരുന്നു. ആള്‍ക്കൂട്ടത്തിന്റെ ആക്രോശവും പ്രതിഷേധവുമുണ്ടായതിനാല്‍ തെളിവെടുപ്പുകള്‍ പോലും പൂര്‍ത്തിയാക്കാന്‍ പോലീസിനു കഴിഞ്ഞിരുന്നില്ല. കോടതിയില്‍ ഹാജരാക്കിയപ്പോഴും വന്‍ ജനക്കൂട്ടമെത്തി. ഇതേത്തുടര്‍ന്ന്‌ താരത്തെ നേരിട്ട്‌ ഹാജരാക്കുന്നത്‌ ഒഴിവാക്കി വീഡിയോ കോണ്‍ഫ്രറണ്‍സിങ്ങിലൂടെയാണു കോടതി നടപടി പൂര്‍ത്തിയാക്കിയത്‌.
