Don't Miss

സണ്ണി ലിയോൺ കൊച്ചിയിൽ

കൃത്യം പതിനൊന്ന് മണിക്ക് എത്തുമെന്ന് സണ്ണി ലിയോണ്‍ അറിയിച്ചിരുന്നത് കൊണ്ട് പത്ത് മണിക്ക് മുന്‍പേ ഇടംപിടിക്കാന്‍ ആളുകള്‍ എത്തിത്തുടങ്ങി.
കൊച്ചി എംജി റോഡിലെ മഹാരാജാസ് ഗ്രൗണ്ടിന് മുന്‍പിലുള്ള ചെറിയ പന്തലിലേക്ക് കണ്ണ് നട്ട് നൂറുകണക്കിന് പേര്‍. ആദ്യം എത്തിയവര്‍ മുന്‍നിരയില്‍ ഇടംപിടിച്ചു. മെട്രോ തൂണുകള്‍ക്ക് ഇടയിലുള്ള മീഡിയനിലും ഫുട്‍പാത്തിലും ആളുകള്‍ നിറഞ്ഞു. എംജി റോഡില്‍ ട്രാഫിക് പതുക്കെയായി.

പതിനൊന്ന് മണിക്ക് സണ്ണി ലിയോണ്‍ എത്തിയില്ല, പകരം അവതാരക രഞ്ജിനി ഹരിദാസ് സ്റ്റേജിലെത്തി. അപ്പോഴേക്കും എംജി റോഡ് മനുഷ്യരുടെ കടലായി മാറിയിരുന്നു. നില്‍ക്കാന്‍ ഇടംകിട്ടാത്തവര്‍ എല്‍ഐസി കെട്ടിടത്തിലും സ്റ്റേറ്റ് ബാങ്ക് കെട്ടിടത്തിലും കയറി നിന്നു.
പതിയെ എംജി റോഡ് നിശ്ചലമായി. വാഹനങ്ങള്‍ക്കൊന്നും പോകാന്‍ വയ്യാത്തത്ര തിരക്ക്. ആളുകള്‍ മറൈന്‍ ഡ്രൈവ് വാക്ക് വേ പോലെ എംജി റോഡ് ഉപയോഗിക്കാന്‍ തുടങ്ങി. തിരക്ക് നിയന്ത്രിക്കാന്‍ പോലീസും കഷ്‍ടപ്പെട്ടു. ആയിരങ്ങള്‍ക്കിടയില്‍ കടലില്‍ കലക്കിയ കായംപോലെ കുറച്ച് പോലീസുകാര്‍.


‘സണ്ണി’ ‘സണ്ണി’ വിളികളുമായി ആരാധകര്‍ റോഡില്‍ നിലയുറപ്പിച്ചു. പാര്‍ക്ക് ചെയ്‍തിരുന്ന ബൈക്കുകളുടെ നീണ്ടനിര മറ്റുവാഹനങ്ങളെ മെല്ലെപോകാന്‍ പ്രേരിപ്പിച്ചു.
ഇതിനിടയില്‍ കോര്‍പറേഷന്‍ ബാങ്കിന്‍റെ എടിഎം കൗണ്ടറിന്‍റെ മേല്‍ക്കൂര ആളുകള്‍ പൊളിച്ചു. കൗണ്ടറിന് മുകളില്‍ കയറിനിന്നവരുടെ ഭാരം കാരണം മേല്‍ക്കൂര ഇടിയുകയായിരുന്നു. തൊട്ടുപിന്നാലെ ആളുകളെ നിയന്ത്രിക്കാന്‍ പോലീസ് ഇറങ്ങിയതോടെ ലാത്തിച്ചാര്‍ജ് ആണെന്ന കിംവദന്തികള്‍ പിന്‍നിരകളിലേക്ക് പരന്നു. ഇടയ്‍ക്കൊരു ആംബുലന്‍സ് എത്തിയപ്പോള്‍ എംജി റോഡില്‍ വാഹനങ്ങളുടെ ഹോണടികളുടെ കൂട്ടപ്പൊരിച്ചിലായി.


പന്ത്രണ്ട് മണിയോടെ സണ്ണി ലിയോണിന്‍റെ ഔഡി കാര്‍ എത്തി. ആര്‍പ്പുവിളികള്‍ ഉച്ചസ്ഥായിയിലെത്തി. എംജി റോഡ് നിശ്ചലമായി. സണ്ണി ലിയോണിന്‍റെ അംഗരക്ഷകര്‍ കാറിന് ചുറ്റും വലയം തീര്‍ത്തു. തിരക്കിനിടയില്‍ നിന്ന് ആരാധനാപാത്രത്തെ കാണാന്‍ ജനങ്ങള്‍ കാറ് വളഞ്ഞു.


ആയിരങ്ങള്‍ സാക്ഷിയായി കാറില്‍ നിന്ന് സണ്ണി ലിയോണ്‍ പുറത്തിറങ്ങിയപ്പോള്‍ ആര്‍പ്പുവിളികളും അഭിവാദ്യങ്ങളുംകൊണ്ട് എംജി റോഡ് മുഖരിതമായി.
ഗോള്‍ഡന്‍ ഗൗണില്‍ തിളങ്ങി സണ്ണി ലിയോണ്‍ സദസിലേക്ക് എത്തി. ക്യാമറകള്‍ അവരെ വളഞ്ഞു. ആദ്യം പുഞ്ചിരിയോടെ കാണികളെ നോക്കി, പിന്നെ കൈവീശലുകള്‍…

Total
0
Shares

About admin